لو يطول الليل هييجي أكيد نهار بعديه

إوعى تندم "يوم" ..

إوعى تبكي ليالي .. دمعك "غالي" .. إوعى يهون ..



إرضى بالمقسوم ..



ده اللي مكتوب لينا بكرة يجينا "مهما يكون" ..



إنسى جرحك و إنسى الآه .. تبكي ليه ؟! سيبها على الله ..



"لو يطول الليل هييجي أكيد نهار بعديه" ..



مهما كان الحظ قليل .. خلّي صبرك "صبر جميل"



دنيا مش بتدوم و جايلك يوم هتفرح فيه ..!



لو حبيبك راح .. لو يبيع لياليك و يجرح فيك .. و لو هيغيب



ياما لسّه قلوب .. الدفا جوّاها كل مناها تلقى حبيب ..



يعني دوّر بين الناس .. ع الوفا و على الإخلاص .. "ع اللي قلبه شاريك و خوفه عليك يبان في عينيه"



اللي قلبه ما ينسى هواك .. اللي عمره بحاله فداك .. اللي يسكن فيك و يحلم بيك و تحلم بيه ..



تفرح ليالي ... تحزن ليالي !! حتى في دموعك حـِــــب الحيـــاة ..!!

إيه اللي جنب زرار الباور ؟؟

أجمل زرار في الكمبيوتر .. لما برنامج يعملها أو التاسك "مانيجر" يقول "أنا أوفف" .. أكيد مفيش غير حل واحد ..! أقرب حل طبعاً عشان تبدأ تتابع نشاطاتك من تاني على رواقة .. إضغط ريستارت

طبعاً الريستارت ده هيخليك تبدأ حياتك مع الكمبيوتر بتاعك من بعد تنزيل الويندوز .. طبعاً بدون مشاكل بدون متاعب اللهم إلا إذا كان جهازك محتاج ويندوز اصلاً .. الريستارت مفيد جداً لأنه أكيد هيريح الذاكرة المؤقتة و هتبدأ التعامل فيه مع برامج أشيك متهنجش جهازك ..

فكرت قبل كده تعمل ريستارت لحياتك ؟؟ أكيد فكرت لكن عاوز أقولك صعب جداً يمكن مستحيل لأنك عند اللحظة دي هتكون بتفكر تغيّر الويندوز و ده ساعتها هيبقى في غاية الصعوبة .. لأنك لازم تكمل نشاطاتك في أسرع وقت ! مين هيناولك اسطوانة نورتون جوست أو ويندوز و تنزل تعريفات من الأول مع هارد مش مستعد يتفرمت من الأول ؟

طيب الريستارت أكيد هينفع في نشاط معين بتعمله .. في علاقتك مع ربنا .. في علاقتك بصاحبك .. في بيتك .. في شغلك .. و للترتيب مغزى ! معنى كده إنك تحاول تعمل توفيق لنسخة الويندوز بتاعتك مع العالم الخارجي لإنك مش هتغيّرها زي ما قلت عشان إنت مستعجل

التوفيق أو التكيّف مش هييجي من ضغطة زرار .. و التغيير أكيد أوله صعب لكن حاول .. مع كل نقطة بتكسبها بتاخد دافع إبن لذينة عشان تكسب النقطة اللي بعدها .. و كده يتم التغيير

قريب أوي هعمل ريستارت "منهم" عشان إكتشفت إن البرنامج اللي حاولت أشغّله مش ماشي مع النسخة بتاعتي ..! أو بمعنى أصح سحب الرامات على الفاضي .. أو بمعنى أصح كنت بشغّل برنامج مهمّته إنه يملا جهازك تيمبات بدون تحيّز ! آه علمني أتعامل مع التيمبات إزاي و علمني أنضّف جهازي أول بأول .. و علمني أعمل ريستارت ! هو متعب في أوله بس أكيد ريستارت مفيد .. دعواتكم

أنا قلت مرحاض فكري ..!

لوني المفضل : الأحمر

ماركة العربية اللي عاوزها تبقى بتاعتي في يوم من الأيام : فولكس فاجن

رقمي المفضل : 9

شبكة المحمول المفضّلة : فودافون

أكتر حاجة أكرهها : الكذب

اللي بعده : النميمة

أكتر أكلة أحبها : المكرونة بالبشاميل

أكتر مشروب أحبّه : الشاي

مطرب كان نفسك تسمعه من بدري : محمد منير

أكتر كافيه أحبه : اللي عليه أصحاب بحبهم

فاهمين كويس أوي بس زملكاوية للأسف ؟؟ عاصم + محمد (فرج - أشرف)

أكتر آلة وتريّة بحبها : الكمان

أكتر فيلم أجنبي بحبه : The Pursuit of Happ"y"ness

أكتر فيلم أجنبي بهرني : The Usual Suspects

أكتر مطرب بحبه : لؤيّ

أكتر أغنية بحبها : آه يا عيني يا ليل

آخر واحد اتعرّفت عليه و كان نفسك تعرفه من بدري : أحمد توفيق

أكتر شريط له ذكريات معايا : شريط فيروز الأحمر اللي بابا مسجّله في هولندا سنة 1979

أول عربية سوقتها : هيونداي فيرنا

أول واحد عرفت معاه معنى الصداقة : هيثم أحمد

أكتر هواية بحبها : الفيديو مونتاج

بعدها : القراءة

أكتر كليب عملته و حبيته : Better than SUPERMAN

أكتر واحد كرهته من المطربين : تامر زفت

البرج الفلكي : الميزان

أكتر كاتب بحبه : د. أحمد خالد توفيق

أكتر واحد في أصحابك مش واخد حقه صح : أحمد غلوش

أكتر كتاب عجبني : يوتوبيا

الولاعة السخّان وللا الترس ؟؟ الترس

موبينيل وللا اتصالات ؟؟ فودافون

عايز تشتري إيه اليومين دول ؟؟ كاميرا ديجيتال

العاميّة وللا الفصحى ؟؟ الفصحى قطعاً :)

بتحب اللي مش بيفرق بين الـ "ى" و الـ "ي" ؟؟ لا طبعاً

عندك إي-ميل على الياهوو أو الهوت ميل و فيهم تواريخ سنين - 2000 و حاجة مثلا ؟؟؟ الحمد لله الذي عافانا مِمَّ ابتلى به غيرنا

مين أكتر واحد انت فرحان إنك صاحبته من اسكندرية ؟؟ مهند مدحت اللي تليفونه سايلنت

بتحب الأهلي ؟؟ احنا حنهزر ؟؟

عادل إمام ؟؟ كنت بحبه

شخصية كوميكس ؟؟ بات مان

هكمّل بعدين ..

عيد ميلادي ..

بعد نصيحة هشام الخيّاط بكتابة بوست بالعامّية .. يبقى هكتب البوست دي بالعامية ..! الطريقة طبعاً مش المضمون

أعتقد إن فيه كذا سنة من عمري - و أنا صغيّر شوية - خسرتهم بسبب افتقاد "القيمة" دي ..

و أفتكر إن أكتر الناس اللي بحبهم و بحترمهم بيبقى لسبب احترامهم "للقيمة" دي ..

و أكيد الناس اللي هتكمل معايا باقي حياتي قابلتهم أو لسه مقابلتهمش بيقدّروا "القيمة" دي ..

قيمة إن حد يقولك كل سنة و انت طيب .. مش واحد بس لا دول بيبقوا ناس كتير بيحبوك و بتحبهم

قيمة إن حد يسأل عليك لما تتعب و يفضل معاك لحد ما تصحى

قيمة إن يصحّيك من النوم عشان يوريك مفاجأة حلوة لمجرد إنه يشوفك فرحان

قيمة إن حد يقضي معاك وقت حلو أوي على كافيه انت بتحبه و يكلمك في موضوع إنت بتحبه

قيمة إن ناس تجيب سيرتك بالخير في وجودك و غيابك

قيمة إن الناس دي تحل مشاكلك بمجرد ما تفكّر فيها

قيمة إنهم يلاحظوا إن عندك مشكلة أصلاً عشان بان عليك متضايق

قيمة إنك مش هتمشي لوحدك

قيمة إنهم يخلّوا الشغل بتاعك وقت ممتع على عكس الكاريكاتيرات المصرية و مفهومها عن الشغل

قيمة إن دراستك تتحسّر على إنها خلصت عشان مش هتقابلهم تاني

قيمة إنك تحب موبايلك و عربيتك عشان شاركتهم الوقت بيهم

قيمة إنك تسمع أغاني سمعتها معاهم أو و همّا موجودين

قيمة إنك تلاقي لإبداعك معجبين و لتهييسك الزيادة نقّاد

قيمة إنك تفتح باب بيتك , علبة , باب عربيتك أو تقعد على الكافيه المفضّل ليك و تلاقيهم عاملين حاجة عشانك

قيمة إنك تلاقي ناس تقرا الكلام ده كلّه و إنت عارف إنه من مكونات "المرحاض الفكري" اللي انت بنيته

قيمة (((الصداقة)))

اللي يحبّها بحبّه .. و اللي ميقدّرهاش و الله العظيم ما بحبّه

بالمناسبة .. النهاردة يبقى عيد ميلادي .. و ده أكتر عيد ميلاد فرحت فيه بأصحابي و بنفسي .. و بالمناسبة هشام الخياط أول واحد خطر على بالي لمّا بدأت أكتب البوست لأنه أكتر واحد شفته بيتأثر بحالة أصحابه .. و بالمناسبة برده دي أول بوست أكتبها و مراجعهاش .. ماهي بالعاميّة